សេចក្តីថ្លែងការណ៍របស់អ្នកនាំពាក្យនៃព្រឹទ្ធសភានៃព្រះរាជាណាចក្រកម្ពុជាថ្កោលទោសអំពើឈ្លានពាន និងការរំលោភអធិបតេយ្យភាពកម្ពុជា ដោយប្រទេសថៃ
ព្រឹទ្ធសភានៃព្រះរាជាណាចក្រកម្ពុជាបានសម្តែងនូវការថ្កោលទោសយ៉ាងដាច់អហង្ការបំផុតចំពោះការវាយប្រហារយ៉ាងព្រៃផ្សៃពីសំណាក់កងកម្លាំងប្រដាប់អាវុធថៃលើជនស៊ីវិលកម្ពុជា មកលើប្រជាពលរដ្ឋខ្មែរនៅភូមិព្រៃចាន់ ខេត្តបន្ទាយមានជ័យ នៅថ្ងៃទី១២ ខែវិច្ឆិកា ឆ្នាំ២០២៥ ដែលបានបណ្តាលឱ្យពលរដ្ឋម្នាក់ស្លាប់ និងរបួសបីនាក់។ ទង្វើដ៏ព្រៃផ្សៃនេះ គឺជាការរំលោភបំពានយ៉ាងគឃ្លើនលើអធិបតេយ្យភាព និងបូរណភាពទឹកដីរបស់កម្ពុជា ក៏ដូចជាការបំពានធ្ងន់ធ្ងរលើច្បាប់មនុស្សធម៌អន្តរជាតិ និងធម្មនុញ្ញអាស៊ាន។
ហេតុការណ៍ដ៏សោកសង្រេងនេះបានកើតឡើង ទោះបីជាមានការចុះហត្ថលេខាលើសេចក្តីថ្លែងការណ៍រួមនៅទីក្រុងកូឡាឡាំពួរ និងយន្តការនានាដែលបានប្តេជ្ញាចិត្តចំពោះការដោះស្រាយវិវាទដោយសន្តិវិធីក៏ដោយ។ ហេតុការណ៍នេះគឺជាការរំលោភបំពានធ្ងន់ធ្ងរលើទំនុកចិត្តគ្នាទៅវិញទៅមក ខណៈដែលកម្ពុជាបានអនុវត្ត “ការអត់ធ្មត់ខ្ពស់ជាអតិបរិមា” ចាប់តាំងពីបទឈប់បាញ់នៅថ្ងៃទី២៨ ខែកក្កដា ឆ្នាំ២០២៥ មក។ ព្រឹទ្ធសភាបានអះអាងពីការគាំទ្រពេញទំហឹងចំពោះសេចក្តីថ្លែងការណ៍ថ្កោលទោសរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយបានព្រមានថា រាល់ការប៉ុនប៉ងបំផ្លាញសន្តិភាព ឬបង្កគ្រោះថ្នាក់ណាមួយដល់ប្រជាពលរដ្ឋកម្ពុជាស្លូតត្រង់ នឹងត្រូវជួបប្រទះនូវការការពារអធិបតេយ្យភាពជាតិកម្ពុជាយ៉ាងម៉ឺងម៉ាត់ និងខ្លាំងក្លាបំផុត។
ព្រឹទ្ធសភានៃព្រះរាជាណាចក្រកម្ពុជា
